Við mættum endilega gera meira af því að hrósa hvert öðru í daglegu amstri, öll sem eitt. En fötluðu fólki þarf ekki að hrósa sérstaklega fyrir að taka þátt í samfélaginu, sinna hugðarefnum sínum eða daglegu lífi. Fatlað fólk er hluti af mannlegum breytileika, ekki afbrigðileg frávik.

Fatlað fólk þarf að geta komist á alla þá staði sem ófatlað fólk fer um. Þannig þarf hönnun og útfærsla alls húsnæðis að miða að því að allir hafi gott aðgengi.

Fatlað fólk og börn þeirra búa oft við fátækt og jaðarsetningu en 1 af hverjum 3 fötluðum einstaklingum býr við fátækt. Félagslegar og fjárhagslegar aðstæður fólks með fötlun hafa mikil áhrif á líf þeirra. Margir búa við þröngan kost og eiga erfitt með að ná endum saman. Slíkt skapar kvíða, álag og streitu og hefur neikvæð áhrif á heilsu og líðan.

Aðgengismálum er víða afar ábótavant í samfélaginu. Margar stofnanir, þjónustuveitur, verslanir og almenningsstaðir bjóða upp á takmarkað aðgengi fyrir hreyfihamlaða og lamaða þó nýbyggingum fjölgi þar sem gert er ráð fyrir að fatlað fólk geti sinnt erindum sínum.

Réttindi fatlaðs námsfólks eru brotin ef það hefur ekki aðgang að verklegum og bóklegum tímum, hópastarfi, umræðum og öllu því sem námið krefst. Ríki og sveitarfélög bera ábyrgð á að tryggja aðgengi að öllum stofnunum, þar með talið menntastofnunum.

Hreyfihamlaðir einstaklingar búa við mismikla fötlun. Margir þeirra lifa algjörlega sjálfstæðu lífi en léleg aðgengismál bitna jafnt á þessum hópi og þeim sem lifa með mikilli fötlun.

Við erum öll jöfn, óháð líkamlegu atgervi og útliti. Sjálfsbjörg berst fyrir bættu aðgengi, réttindum og velferð fatlaðs fólks og þeirri staðreynd að allir einstaklingar eiga jafnan rétt til þátttöku í samfélaginu.

Fatlaðar konur eru allt að 10 sinnum líklegri til að vera beittar líkamlegu eða kynferðislegu ofbeldi og ofbeldið gegn þeim varir lengur. Næstum 80% fatlaðra kvenna hafa verið beittar líkamlegu eða andlegu ofbeldi en einnig ofbeldi sem tengist skerðingu þeirra.